தூத்துக்குடி மாவட்ட கைப்பந்து கழகம் சார்பில் நடத்தப்படும் 27வது ஆண்டு அகில இந்திய சத்யா கோப்பைக்கான மின்னொளி கைப்பந்து போட்டி நேற்று கோலாகலமாக தொடங்கியது. வரும் ஜூன் 14ஆம் தேதி வரை நடைபெறும் இந்தப் போட்டித் தொடரில் ஆண்கள் பிரிவில் 6 அணிகளும், பெண்கள் பிரிவில் 4 அணிகளும் பங்கேற்று விளையாடுகின்றன.
தூத்துக்குடி பழைய பேருந்து நிலையம் அருகிலுள்ள அரசு மைதானத்தில் நடைபெற்ற தொடக்க விழாவிற்கு மாவட்ட கைப்பந்து கழகத் தலைவர் ஜான் வசீகரன் வரவேற்புரை வழங்கினார். தூத்துக்குடி வ.உ.சி. துறைமுக ஆணையத்தின் துணைத் தலைவர் ராஜேஷ் சௌந்தர்ராஜன் தலைமை வகித்து போட்டியைத் தொடங்கி வைத்தார்.
சிறப்பு விருந்தினர்களாக சத்யா குடும்பத்தின் பொது மேலாளர் வில்சன் மற்றும் தமிழ்நாடு மெர்கண்டைல் வங்கியின் துணைத் தலைவர் கௌதமன் ஆகியோர் கலந்துகொண்டு வீரர், வீராங்கனைகளுக்கு வாழ்த்துகளைத் தெரிவித்தனர். தொடக்க ஆட்டமாக பெண்கள் பிரிவு போட்டி நடைபெற்றது. இதில் கேரள மாநிலத்தின் எம்.ஜி. பல்கலைக்கழக அணியும், கொல்கத்தா கிழக்கு ரயில்வே அணியும் மோதின. போட்டியை காண ஏராளமான விளையாட்டு ஆர்வலர்கள் திரண்டிருந்தனர்.
நிகழ்ச்சியில் மாவட்ட கைப்பந்து கழகச் செயலாளர் ரமேஷ்குமார், பொருளாளர் ரவிராஜன் உள்ளிட்ட நிர்வாகிகள் மற்றும் விளையாட்டு ஆர்வலர்கள் பலர் கலந்து கொண்டனர். மாநிலங்களைத் தாண்டி முன்னணி அணிகள் பங்கேற்றுள்ளதால், இந்த ஆண்டு சத்யா கோப்பை கைப்பந்து போட்டி ரசிகர்களிடையே பெரும் எதிர்பார்ப்பை ஏற்படுத்தியுள்ளது.
