தூத்துக்குடி வாக்காளர் பட்டியல் திருத்தப் பணிகள்: பகுதி செயலாளர் ரவீந்திரனிடம் முதல்வர் ஸ்டாலின் நேரில் கேட்டறிந்து வழிகாட்டல்!!

தூத்துக்குடி சட்டமன்றத் தொகுதியில் வாக்காளர் பட்டியல் சிறப்பு தீவிர திருத்தப் பணிகள் தீவிரமாக நடைபெற்று வரும் நிலையில், வடக்கு மாவட்ட திமுக செயலாளரும் சமூகநலன் மற்றும் மகளிர் உரிமைத்துறை அமைச்சருமான கீதாஜீவன், பொதுமக்கள் தங்கள் வாக்குரிமையை பாதுகாக்க அவசியமான நடவடிக்கைகளை உடனடியாக மேற்கொள்ள வேண்டுகோள் விடுத்திருந்தார்.

தமிழக சட்டமன்றத் தேர்தல் நெருங்கிவரும் சூழலில், தேர்தல் ஆணையம் அறிவித்துள்ள சிறப்பு திருத்தப் பணிகள் தொடர்பாக பொதுமக்கள் மத்தியில் சில குழப்பங்கள் நிலவி வருகின்றன. குறிப்பாக 2002ம் ஆண்டு வாக்காளர் விவரங்களைத் தேடுவதில் மக்களுக்கு சிரமம் ஏற்படுகிறது. இதேபோல், கணக்கீட்டு படிவங்களை நிரப்புதல், பெற்றல் – திருப்பி வழங்குதல் போன்ற பணிகளில் ஈடுபடும் அரசு ஊழியர்களுக்கும் நேரத் தட்டுப்பாடு காரணமாக சிரமம் உருவாகியுள்ளது.

வாக்காளர் பெயர் சேர்க்கை மற்றும் திருத்தப் பணிகளுக்காக பொதுமக்கள் நிரப்பும் படிவங்களை வரும் டிசம்பர் 4ஆம் தேதிக்குள் அந்தந்த வாக்குச்சாவடி நிலை அலுவலர்களிடம் அல்லது அங்கீகரிக்கப்பட்ட அரசியல் கட்சிகளின் வாக்குச்சாவடி முகவர்களிடம் நேரடியாக வழங்கலாம். வழங்கும் போது இரண்டு நகல்களில் ஒன்றை விவரம் நிரப்பியதற்கான அத்தாட்சியாக வைத்துக்கொள்ள வேண்டும்.

பின்னர் டிசம்பர் 9ஆம் தேதி வெளியிடப்படும் வரைவு வாக்காளர் பட்டியலில் தங்கள் பெயர் சேர்க்கப்பட்டுள்ளதா என்பதை மக்களே கண்காணிக்க வேண்டும். சேர்க்கப்படாதிருந்தால் உடனடியாக மீண்டும் சேர்க்க விண்ணப்பிக்க வேண்டும். வாக்குரிமை பறிபோகாமல் பாதுகாக்க விழிப்புடன் செயல்படுவது அவசியமென மாவட்ட திமுக நிர்வாகம் வலியுறுத்தியுள்ளது.

இந்நிலையில், பொதுமக்களுக்கு நேரடி உதவியை வழங்கும் நோக்கில் வடக்கு மாவட்ட திமுக சார்பில் தூத்துக்குடி தொகுதியில் பல்வேறு உதவி மையங்கள் தொடங்கப்பட்டுள்ளன. மேலும் வரும் சனிக்கிழமை 22ஆம் தேதி அனைத்து வாக்குச்சாவடிகளிலும் நடைபெறும் சிறப்பு முகாம்களை மக்கள் பயன்படுத்திக் கொள்ள வேண்டும் என அறிவுறுத்தப்பட்டுள்ளது.

இதனை தொடர்ந்து, தூத்துக்குடி அண்ணாநகர் பகுதியின் 10 வாக்குச்சாவடிகளில் நடைபெறும் முன் பரிசீதல் பணிகளின் முன்னேற்றத்தைப் பற்றி, தமிழக முதல்வரும் திமுக தலைவருமான மு.க. ஸ்டாலின், பகுதி செயலாளர் ரவீந்திரனை நேரடியாக தொடர்புகொண்டு கேட்டறிந்தார்.
பகுதியில் நடைபெறும் வாக்காளர் பட்டியல் பணிகளில் முழு மனநிலை ஒருமைப்பாட்டுடன், அதிக கவனம் செலுத்தி ஈடுபட வேண்டுமென முதல்வர் ஆலோசனை வழங்கியதாக தகவல்கள் தெரிவிக்கின்றன.

மேலும், எப்போது வேண்டுமானாலும் முதல்வர் ஆன்லைன் அழைப்பில் பணிநிலை ஆய்வு மேற்கொள்ளக் கூடிய சூழல் இருப்பதால், அனைத்து நிர்வாக பங்களிப்பாளர்களும் மிகுந்த கவனத்துடன் பணிகளில் ஈடுபட்டு வருகிறார்கள்.

தூத்துக்குடி தொகுதியில் வாக்காளர் பட்டியல் பணிகள் முழு வேகத்தில் முன்னெடுக்கப்பட்டு வருவது குறிப்பிடத்தக்கது.