தூத்துக்குடி மாவட்ட அரசியலில் எப்போதும் பரபரப்பாக பேசப்படும் விளாத்திகுளம் சட்டமன்றத் தொகுதி, தற்போது கூட்டணி அரசியல் காரணமாக மீண்டும் கவனத்தின் மையமாக மாறியுள்ளது. அ.தி.மு.க.–பா.ஜ.க. தலைமையிலான தேசிய ஜனநாயக கூட்டணியில் (NDA) அமமுக இணைந்துள்ள நிலையில், டிடிவி தினகரனுக்கு 6 சட்டமன்றத் தொகுதிகள் மற்றும் ஒரு ராஜ்யசபா எம்பி பதவி ஒதுக்கப்பட வாய்ப்பு இருப்பதாக தகவல்கள் வெளியாகியுள்ளன. அந்த 6 தொகுதிகளில் விளாத்திகுளம் இடம்பெற்றிருப்பதே அரசியல் வட்டாரங்களில் சுவாரஸ்யத்தையும் சர்ச்சையையும் ஏற்படுத்தியுள்ளது.
விளாத்திகுளம் தொகுதியை பொறுத்தவரை, முன்னாள் சட்டமன்ற உறுப்பினர் பி. சின்னப்பன் (அ.தி.மு.க.) குறிப்பிடத்தக்க முகமாக இருந்து வந்தவர். 2006 சட்டமன்றத் தேர்தலில் அ.தி.மு.க. சார்பில் வெற்றி பெற்ற அவர், 2019 இடைத்தேர்தலிலும் அதே தொகுதியில் மீண்டும் வெற்றி பெற்று சட்டமன்ற உறுப்பினராகப் பணியாற்றினார். இதனால், “விளாத்திகுளம் என்றாலே சின்னப்பன்” என்ற அடையாளம் ஒரு காலத்தில் நிலவியது.
ஆனால், அரசியல் காலம் ஒரே இடத்தில் நிற்காது என்பதை தற்போது நடக்கும் கூட்டணி பேச்சுவார்த்தைகள் வெளிப்படுத்துகின்றன. NDA-வில் அமமுகவிற்கு விளாத்திகுளம் ஒதுக்கப்பட்டால், அ.தி.மு.க. முன்னாள் எம்எல்ஏ சின்னப்பன் ஓரங்கட்டப்படுவார் என்றே அரசியல் விமர்சகர்கள் கணிக்கின்றனர். “இலவு காத்த கிளி போல வாய்ப்புக்காக காத்திருக்கும் நிலைக்கு சின்னப்பன் தள்ளப்படலாம்” என்றும் அவர்கள் விமர்சிக்கின்றனர்.
இதற்கு மறுபுறம், தற்போதைய சட்டமன்ற உறுப்பினர் ஜி. வி. மார்க்கண்டேயன் (தி.மு.க.) நிலைமை அரசியல் ரீதியாக வலுவாக இருப்பதாகக் கூறப்படுகிறது. 2011-ஆம் ஆண்டு அ.தி.மு.க. சார்பில் இதே தொகுதியில் வெற்றி பெற்ற அனுபவம் கொண்ட மார்க்கண்டேயன், 2021 சட்டமன்றத் தேர்தலில் தி.மு.க. வேட்பாளராக மீண்டும் வெற்றி பெற்று தற்போது எம்எல்ஏ-வாக உள்ளார். உள்ளூர் அரசியல், கட்சி அமைப்பு, ஆட்சி பலம் ஆகியவை மார்க்கண்டேயனுக்கு சாதகமாக இருப்பதாக அரசியல் நோக்கர்கள் தெரிவிக்கின்றனர்.
அரசியல் விமர்சகர்கள் கூறுவதாவது: “தூத்துக்குடி மாவட்டத்தில் உள்ள 6 சட்டமன்றத் தொகுதிகளில், விளாத்திகுளம் தொகுதியை அ.தி.மு.க. தக்க வைத்துக்கொள்ளாமல் அமமுகவிற்கு ஒதுக்கினால், அது தி.மு.க.க்கு நேரடி லாபமாகும். அப்படியான சூழலில், விளாத்திகுளம் தொகுதியில் தி.மு.க. வெற்றி உறுதி செய்யப்பட்டதாகவே கணிக்கலாம்.”
சோளிங்கர், சைதாப்பேட்டை, விளாத்திகுளம், ஆண்டிப்பட்டி, தாம்பரம், தஞ்சாவூர் ஆகிய தொகுதிகள் மீது தினகரன் விருப்பம் தெரிவித்துள்ளதாக வெளியாகும் தகவல்களும், இந்த விவாதத்திற்கு மேலும் தீ ஊற்றியுள்ளது. குறிப்பாக விளாத்திகுளம் போன்ற பாரம்பரிய அரசியல் பின்னணி கொண்ட தொகுதி, கூட்டணி அரசியலில் கைமாறினால் அதன் தாக்கம் மாவட்ட அரசியலையே மாற்றக்கூடும் என்றே மதிப்பிடப்படுகிறது.
மொத்தத்தில், ஒரு காலத்தில் விளாத்திகுளம் அரசியலில் ஆதிக்கம் செலுத்திய முன்னாள் எம்எல்ஏ சின்னப்பன், தற்போது கூட்டணி அரசியலின் கணக்குகளில் ஓரங்கட்டப்படும் சூழல் உருவாகி வருவதாக விமர்சகர்கள் சுட்டிக்காட்டுகின்றனர். அதே நேரத்தில், தற்போதைய எம்எல்ஏ மார்க்கண்டேயனுக்கே மீண்டும் வெற்றி வாய்ப்புகள் அதிகம் உள்ளதாக அரசியல் களத்தில் பேசப்படுகிறது.
விளாத்திகுளம் அரசியல் – யாருக்கு வாய்ப்பு, யாருக்கு ஓரங்கட்டல்?
இந்த கேள்விக்கான பதில், வரவிருக்கும் கூட்டணி முடிவுகளும் தேர்தல் களத்தின் சூழலும் தான் தீர்மானிக்கப் போகின்றன.
